សៀមរាប៖ វិស័យបរធនបាលកិច្ច ត្រូវបានអ្នកជំនាញការ និងវិនិយោគិនជំនាញមើលឃើញថា ជាយន្តការមួយដែលអាចចូលរួមចំណែកអភិវឌ្ឍនៅខេត្តសៀមរាប និងជំរុញការវិនិយោគនៅក្នុងប្រទេសកម្ពុជា និងនិយាយដោយឡែកខេត្តសៀមរាប តាមរយៈការកសាងទំនុកចិត្តវិនិយោគិនឲ្យចូលមកវិនិយោគ។ នេះ បើតាមមន្ត្រីជាន់ខ្ពស់ខេត្តសៀមរាប ។
លោក សំកុល សុចិត្រា អភិបាលរងខេត្តសៀមរាប នៅក្នុងពិធីបើកសិក្ខាសាលាផ្សព្វផ្សាយប្រកាសស្តីពី “វិធានក្នុងការគ្រប់គ្រង ការរៀបចំ និងការប្រព្រឹត្តទៅរបស់បរធនបាលកិច្ច” នៅថ្ងៃទី ១៥ ខែកក្កដា ឆ្នាំ ២០២៤ បញ្ជាក់បន្ថែមថា ជាងនេះទៅទៀត វិនិយោគិនបរទេសដែលពាក់ព័ន្ធនឹងការប្រគល់ទ្រព្យសម្បត្តិរបស់វិនិយោគិន ដែលជាបរធនបាលទាយកទៅឲ្យអ្នកដទៃដែលជាបរធនបាល ដើម្បីគ្រប់គ្រង ចាត់ចែង និងថែរក្សាបរធន ដើម្បីជាប្រយោជន៍ដល់អ្នកទទួលផល។
លោក សំកុល សុចិត្រា មានប្រសាសន៍ថា ៖«តាមរយៈសិក្ខាសាលាដែលរៀបចំឡើងនាពេលនេះ វានឹងជំរុញឲ្យអ្នកពាក់ព័ន្ធដែលបានចូលរួម បានយល់ដឹងបន្ថែមអំពីវិស័យបរធនបាលកិច្ច ដែលជាវិស័យមួយថ្មី ដែលក្នុងនោះរួមមាន៖ វិធាន លក្ខខណ្ឌ និងនីតិវិធីក្នុងការគ្រប់គ្រង ការរៀបចំ និងការប្រព្រឹត្តទៅរបស់បរធនបាលកិច្ចក្នុងព្រះរាជាណាចក្រកម្ពុជា និងបញ្ជ្រាបការយល់ដឹងបន្ថែមផ្នែកហិរញ្ញវត្ថុ»។
លោក សំកុល សុចិត្រា បន្ថែមថា សិក្ខាសាលានេះរៀបចំជូនដល់អ្នកពាក់ព័ន្ធក្នុងខេត្តសៀមរាប ដើម្បីបញ្ជ្រាបការយល់ដឹងដល់រដ្ឋបាលមូលដ្ឋានសាធារណជន ក៏ដូចជាភាគីពាក់ព័ន្ធឱ្យបានយល់ដឹងអំពីវិស័យបរធនបាលកិច្ច ក្នុងការឈ្វេងយល់អំពីវិធាន លក្ខខណ្ឌ និងនីតិវិធីនៃការគ្រប់គ្រង ការរៀបចំ និងការប្រព្រឹត្តទៅរបស់បរធនបាលកិច្ចនៅកម្ពុជា ធានាឲ្យបាននូវសុក្រិតភាពនៃបរធនបាលកិច្ចដែលបានបង្កើត និងចុះបញ្ជី ជំរុញឲ្យការអនុវត្តប្រកបដោយសណ្តាប់ធ្នាប់ តម្លាភាព ប្រសិទ្ធភាព ទំនុកចិត្តពីអ្នកចូលរួមក្នុងវិស័យបរធនបាលកិច្ច
ជុំវិញបញ្ហានេះ លោក សុខ ដារ៉ា អគ្គនាយកនៃនិយ័តករបរធនបាលកិច្ច មានប្រសាសន៍ថា ការអភិវឌ្ឍវិស័យបរធនបាលកិច្ច និងការបង្កើតនិយ័តករបរធនបាលកិច្ចនៅកម្ពុជា គឺជាការគិតគូរល្អិតល្អន់ស្របពេលដែលកម្ពុជា កំពុងស្ថិតលើមាគ៌ាអភិវឌ្ឍន៍យ៉ាងល្អប្រសើរលើគ្រប់វិស័យ ក្នុងក្របខ័ណ្ឌសន្តិភាព ស្ថិរភាពនយោបាយ សន្តិសុខសណ្តាប់ធ្នាប់សង្គម ក្រោមការដឹកនាំរបស់សម្តេចធិបតី ហ៊ុន ម៉ាណែត នាយករដ្ឋមន្រ្តី។
លោក អគ្គនាយក បានបញ្ជាក់ថា ដើម្បីទទួលបាននូវកំណើនសេដ្ឋកិច្ចមួយប្រកបដោយចីរភាព ទាមទារឲ្យមាននូវប្រព័ន្ធហិរញ្ញវត្ថុមួយដ៏រឹងមាំ ដូច្នេះរាជរដ្ឋាភិបាលបានដាក់ចេញនូវ “យុទ្ធសាស្ត្រអភិវឌ្ឍវិស័យហិរញ្ញវត្ថុឆ្នាំ២០១៦-២០២៥” ដែលនឹងត្រូវធ្វើបច្ចុប្បន្នភាពទៅជាយុទ្ធសាស្រ្តអភិវឌ្ឍន៍វិស័យហិរញ្ញវត្ថុ ឆ្នាំ២០២១-២០៣០ និងយុទ្ធសាស្រ្តបញ្ចកោណដំណាក់កាលទី១ ដែលយុទ្ធសាស្រ្តទាំង២នេះ ជាយុទ្ធសាស្រ្តអភិវឌ្ឍវិស័យហិរញ្ញវត្ថុរយៈពេលវែង រួមមានវិស័យធនាគារ និងវិស័យហិរញ្ញវត្ថុមិនមែនធនាគារ ហើយក្នុងនោះដែរវិស័យបរធនបាលកិច្ច នឹងក្លាយជាយុទ្ធសាស្រ្តជួយជំរុញកំណើនសេដ្ឋកិច្ច និងសង្គមនៅកម្ពុជា។
បរធនបាលកិច្ច ជាសេវាហិរញ្ញវត្ថុមួយមិនមែនធនាគារ មានតួនាទីគ្រប់គ្រង មើលថែរក្សា ឬចាត់ចែកទ្រព្យសម្បត្តិរបស់បុគ្គល ឬក្រុមហ៊ុនណាមួយ សម្រាប់ជាប្រយោជន៍ដល់ក្រុមគោលដៅណាមួយ ដែលស្ថិតក្នុងអនុលោមតាមលិខិតបរធនបាលកិច្ច ឬបទប្បញ្ញត្តិជាធរមាន។ បើតាមអ្នកជំនាញ បរធនបាលកិច្ចនេះ ជាវិស័យមួយដែលជួយដល់ការអភិវឌ្ឍវិស័យពាណិជ្ជកម្ម និងសង្គមជាតិ តាមរយៈការទាក់ទាញនូវនិធិសង្គមនានា និងលំហូរទុនវិនិយោគទាំងក្នុង និងក្រៅប្រទេស។
ធនបាលកិច្ច ដែលបានបញ្ជីនៅនិយ័តករបរធនបាលកិច្ចនៅកម្ពុជានាពេលបច្ចុប្បន្ន មាន៤ប្រភេទ។ ក្នុងនោះមាន បរធនបាលកិច្ចសាធារណៈ បរធនបាលកិច្ចពាណិជ្ជកម្ម បរធនបាលកិច្ចសង្គម និងបរធនបាលកិច្ចបុគ្គល។ បរធនបាលកិច្ច ត្រូវបានបង្កើតឡើងដោយបរធនបាលទាយក (ម្ចាស់ទ្រព្យ) ឬបទប្បញ្ញត្តិជាធរមាន ដើម្បីប្រើប្រាស់ទ្រព្យសម្បត្តិរបស់ខ្លួន ក្នុងកម្មវត្ថុអ្វីមួយដោយស្របច្បាប់ និងមិនផ្ទុយពីសណ្តាប់ធ្នាប់សាធារណៈ។
បរធនបាលកិច្ច គឺមានកាតព្វកិច្ចគ្រប់គ្រងទ្រព្យសម្បត្តិរបស់បរធនបាលទាយក សម្រាប់ប្រើប្រាស់ជាប្រយោជន៍ ដល់បុគ្គល ឬក្រុមគោលដៅណាមួយ ដែលនឹងត្រូវទទួលបានអត្ថប្រយោជន៍ ពីទ្រព្យសម្បត្តិនោះ។ កាតព្វកិច្ចរបស់បរធនបាលកិច្ច គឺស្ថិតក្រោមការត្រួតពិនិត្យពីអាជ្ញាធរ ដែលជានិយ័តករបរធនបាលកិច្ច៕
