ភ្នំពេញ ៖ លោក ហ៊ុន ម៉ាណែត នាយករដ្ឋមន្ដ្រីនៃកម្ពុជា មានប្រសាសន៍ថា នយោបាយ ឈ្នះ-ឈ្នះ គឺជាមូលដ្ឋានគ្រឹះ នៃការរក្សាសន្ដិភាពយូរអង្វែង ដោយហេតុថា នយោបាយ ឈ្នះ-ឈ្នះ បានលុបបំបាត់ការរើសអើងខាងជាតិសាសន៍ សាសនា ជាដើម។
នាឱកាសអញ្ជើញជាអធិបតីក្នុងពិធីបញ្ចុះបឋមសិលាសាងសង់បន្ទប់ពិគ្រោះយោបល់សម្រាប់ជនរងគ្រោះ សាលតាំងពិព័រណ៌អចិន្ត្រៃយ៍ ស្តីពីដំណើរការជំនុំជម្រះក្តី និងឧទ្យានសម្រាប់ការចងចាំ នៅព្រឹកថ្ងៃទី១៦ កក្កដា ២០២៤ លោកនាយករដ្ឋមន្ត្រី ហ៊ុន ម៉ាណែត បានថ្លែងថា «សន្ដិភាព និងសង្គ្រាម តំណាងឲ្យទិដ្ឋភាពពីរ នៃរបៀប ដែលយើងប្រាថ្នារស់នៅជាសង្គមមួយ និងរបៀបដែលយើងដោះស្រាយ និងភាពខុសគ្នារបស់យើង។
លោកនាយករដ្ឋមន្ត្រីបន្ថែមថា សន្ដិភាព និងសង្គ្រាម គឺជាស្ថានភាពដ៏ស្មុគស្មាញបំផុត ដែលមនុស្សគ្រប់រូប នឹងត្រូវប្រឈមមុខ មិនថា ជាជនរងគ្រោះ នៃសង្គ្រាម ឬអ្នកនយោបាយនោះទេ គឺចង់បានការបញ្ចប់ជម្លោះ និងការកសាងសន្ដិភាព»។
លោកនាយករដ្ឋមន្ត្រីបន្ដថា «នយោបាយ ឈ្នះ-ឈ្នះ គឺជាមូលដ្ឋានគ្រឹះ នៃការរក្សាសន្ដិភាពយូរអង្វែង ដោយហេតុថា នយោបាយ ឈ្នះ-ឈ្នះ នេះ បានលុបបំបាត់ការរើសអើងខាងជាតិសាសន៍ ខាងសាសនា រវាងក្រុមមនុស្ស ព្រមទាំងបានផ្ដល់លទ្ធិភាពដល់ពលរដ្ឋខ្មែរទាំងអស់ រួបរួមសុខដុមរមនា ក្នុងសង្គមជាមួយគ្នាថែមទៀតផង»។
ជាងនេះទៅទៀត លោក នាយករដ្ឋមន្ដ្រី បន្ថែមថា តាមរយៈនយោបាយ ឈ្នះ-ឈ្នះ នេះ រាជរដ្ឋាភិបាលកម្ពុជា ក៏បានបង្កើត អ.វ.ត.ក.ដោយ មានកិច្ចសហការដ៏ល្អប្រសើរពីអង្គការសហប្រជាតិ និងការឧបត្ថម្ភគាំទ្រជាថវិកាពីសហគមន៍ អន្តរជាតិ ដើម្បីផ្តល់យុត្តិធម៌ដល់ជនរងគ្រោះនៃរបបខ្មែរក្រហម, ការផ្សះផ្សាសង្គមដែលបែកបាក់, ការលុបបំបាត់វប្បធម៌និទណ្ឌភាព, និងជាការផ្តល់សារមួយសម្រាប់មេដឹកនាំ នៃបណ្តាប្រទេស ទូទាំងពិភពលោកអំពីផលវិបាក នៃការប្រព្រឹត្តអំពើសាហាវយង់ឃ្នងព្រៃផ្សៃរបស់ពួកគេ។
សូមរំលឹកថា នយោបាយឈ្នះ-ឈ្នះ ត្រូវបានដាក់ចេញដោយលោក ហ៊ុន សែន អតីតនាយកដ្ឋមន្ត្រី និងបច្ចុប្បន្នជាប្រធានព្រឹទ្ធសភា បានបញ្ចប់សង្គ្រាមស៊ីវិលទាំងស្រុងនៅកម្ពុជាចាប់តាំងពីឆ្នាំ១៩៩៨ រហូតមកដល់បច្ចុប្បន្ន ធ្វើឱ្យប្រទេសជាតិមានសុខសន្តិភាព ការគោរពសិទ្ធិមនុស្ស លទ្ធិប្រជាធិបតេយ្យ ការអភិវឌ្ឍសេដ្ឋកិច្ច-សង្គម ការពង្រឹងនីតិរដ្ឋ និងសន្ដិសុខគតិយុត្ដ។
លោក ក៏បានប្រើយុទ្ធសាស្ត្រ DIFID (បំបែក ឯកោ បញ្ចប់ ធ្វើសមាហរណកម្ម និងអភិវឌ្ឍ) ដោយបំបែកកម្លាំងរបស់ភាគីខ្មែរក្រហម ធ្វើឱ្យកម្លាំងខ្មែរក្រហមនៅឯកោ បញ្ចប់សកម្មភាព និងអង្គការចាត់តាំងរបស់ខ្មែរក្រហម ធ្វើសមាហរណកម្មកម្លាំងដែលព្រមចូលរួមជាមួយរដ្ឋាភិបាល និងធ្វើការអភិវឌ្ឍទីតាំងដែលបានធ្វើសមហរណកម្មហើយ។
ដើម្បីរំលឹកពីសន្តិភាព និងសមិទ្ធផលនៃនយោបាយឈ្នះឈ្នះ ដែលជាកត្តាចម្បងសម្រាប់ជំរុញឱ្យមានការអភិវឌ្ឍប្រទេសជាតិលើគ្រប់វិស័យ រាជរដ្ឋាភិបាលបានសាងសង់ «វិមានឈ្នះឈ្នះ» ដែលមានទីតាំងនៅ សង្កាត់ព្រែកតាសេក ខណ្ឌជ្រោយចង្វា រាជធានីភ្នំពេញ កាលពីថ្ងៃទី២៥ ខែកុម្ភៈ ឆ្នាំ២០១៦ ដែលមានកម្អស់ ៥៤ម៉ែត្រ ទទឹង ៣៦ម៉ែត្រ លើទំហំផ្ទៃដី ៨ហិកតា ហើយសម្ពោធដាក់ឱ្យប្រើប្រាស់ជាផ្លូវការនៅថ្ងៃទី២៩ ខែធ្នូ ឆ្នាំ២០១៨ និងបានប្រារព្វធ្វើទិវានេះ ជារៀងរាល់ឆ្នាំ៕
