បរទេស៖ លោក ដូណាល់ ត្រាំ បាននិយាយថា លោកពិតជាសំណាងណាស់ដែលនៅមានជីវិត បន្ទាប់ពីត្រូវបានខ្មាន់កាំភ្លើងបាញ់ប្រហារក្នុងអំឡុងការប្រមូលផ្តុំយុទ្ធនាការក្នុងរដ្ឋ Pennsylvania កាលពីថ្ងៃសៅរ៍។
យោងតាមសារព័ត៌មាន RT ចេញផ្សាយនៅថ្ងៃទី១៥ ខែកក្កដា ឆ្នាំ២០២៤ បានឱ្យដឹងថា ជនសង្ស័យជាឃាតករឈ្មោះ Thomas Matthew Crooks អាយុ ២០ឆ្នាំបានបាញ់យ៉ាងហោចណាស់ ៧គ្រាប់ នៃកាំភ្លើងពាក់កណ្តាលស្វ័យប្រវត្តិ AR-15 ក្នុងទិសដៅតម្រង់មកលើអតីតប្រធានាធិបតីសហរដ្ឋអាមេរិកដោយគ្រាប់កាំភ្លើងមួយគ្រាប់ត្រូវចំត្រចៀកខាងស្តាំរបស់លោក។ អ្នកគាំទ្រលោក ត្រាំ ម្នាក់ត្រូវបានសម្លាប់ និងពីរនាក់ផ្សេងទៀតបានរងរបួសយ៉ាងធ្ងន់ធ្ងរនៅក្នុងការវាយប្រហារ ហើយ ខ្មាន់កាំភ្លើង Crooks ត្រូវបានបាញ់សម្លាប់នៅនឹងកន្លែងដោយមន្រ្តីសេវាសម្ងាត់។
លោក ដូណាល់ ត្រាំ បាននិយាយនៅក្នុងបទសម្ភាសន៍ជាមួយកាសែត New York Post កាលពីថ្ងៃអាទិត្យថា “ខ្ញុំមិនគួរនៅទីនេះទេ ខ្ញុំទំនងជាស្លាប់” ។ លោក ត្រាំ ដែលមានអាយុ ៧៨ឆ្នាំទៅហើយនោះ បាននិយាយទៅកាន់អ្នកសារព័ត៌មាននៅលើយន្តហោះឯកជនរបស់លោក តាមផ្លូវទៅកាន់ទីក្រុង Milwaukee សម្រាប់សន្និបាតជាតិនៃសាធារណរដ្ឋ ដែលគាត់ត្រូវបានគេរំពឹងថានឹងត្រូវបានជ្រើសរើសជាបេក្ខភាពប្រធានាធិបតីរបស់គណបក្សសម្រាប់ការបោះឆ្នោតនៅថ្ងៃទី ៥ ខែវិច្ឆិកា។
សេដ្ឋីដែលបានប្រែក្លាយជាអ្នកនយោបាយរូបនេះបាននិយាយថា វេជ្ជបណ្ឌិតម្នាក់បានប្រាប់គាត់ថាវាជា «អព្ភូតហេតុ» ដែលគាត់បានរួចជីវិត។ លោកបានបន្ថែមថា «ដោយសំណាង ឬដោយព្រះ មនុស្សជាច្រើនកំពុងនិយាយថាវាគឺដោយសារព្រះ ទើបខ្ញុំនៅតែនៅទីនេះ»។
យោងតាមលោក ត្រាំ គាត់បានជៀសវាងការរងរបួសដ៏ធ្ងន់ធ្ងរតែប៉ុណ្ណោះព្រោះនៅពេលដែលការបាញ់ដំបូងត្រូវបានបាញ់គាត់បានងាកក្បាលរបស់គាត់បន្តិចទៅខាងស្តាំដើម្បីអានតារាងស្តីពីជនអន្តោប្រវេសន៍ខុសច្បាប់នៅក្នុងសហរដ្ឋអាមេរិក។
គាត់បាននិយាយថា សេវាសម្ងាត់ “បានធ្វើការងារដ៏អស្ចារ្យ” ដោយបន្សាបអ្នកវាយប្រហារយ៉ាងឆាប់រហ័ស “គេយកគាត់ចេញដោយមួយគ្រាប់ចំចន្លោះភ្នែក”។
លោក ត្រាំ បាននិយាយថា លោកចង់បន្តការប្រមូលផ្តុំនេះ បន្ទាប់ពីការវាយប្រហារ ប៉ុន្តែភ្នាក់ងារបានប្រាប់គាត់ថា វាមិនមានសុវត្ថិភាព ហើយថាគាត់ត្រូវទៅមន្ទីរពេទ្យ។ គាត់បានរំឭកថា៖ «ខ្ញុំគ្រាន់តែចង់និយាយបន្ត ប៉ុន្តែខ្ញុំទើបតែត្រូវបានគេបាញ់ប្រហារ»។ ពេលគាត់ត្រូវបានគេនាំចេញពីឆាក អតីតប្រធានាធិបតីត្រូវបានគេថតរូបបានលើកកណ្តាប់ដៃហើយស្រែកថា៖ «ប្រយុទ្ធ! ប្រយុទ្ធ! ប្រយុទ្ធ!”៕
